ປາຂ່າ (ໂລມາອີຣະວະດີ)
(ປ່ຽນເສັ້ນທາງມາຈາກ ປາຂ່າ(ໂລມາອີຣະວະດີ))
ເປັນອີກໂປແກມໜຶ່ງທີ່ບໍ່ຄວນພາດຊົມ ເພາະຄວາມສະດວກສະບາຍຈາກການເດິນທາງດ້ວຍລົດ ເທິງທາງເສັ້ນທາງເລກທີ 13 ໃຕ້ ປະມານຫລັກກິໂລແມັດທີ 154 ຫລື ຫ່າງຈາກທາງເຂົ້ານ້ຳຕົກຕາດຄອນພະເພັງ ປະມານ 5 ກິໂລແມັດ ກົງເຂົ້າໄປສູ່ ທ່າເຮືອເຮືອນເວີນຄຳ ອີກ 6 ກິໂລແມັດ ການລ່ອງເຮືອເພື່ອທ່ຽວຊົມ ໂລມານ້ຳຈືດ (ປາຂ່າ) ຈະຕ້ອງລ່ອງເຮືອອອກໄປຈົນເກືອບເຖິງເຂດຕິດຕໍ່ຊາຍແດນ ລະຫວ່າງ ປະເທດລາວ ແລະ ປະເທດກຳປູເຈຍ ຖ້າຕ້ອງການຊົມໃນລະຍະທີ່ເບິ່ງເຫັນໄດ້ຖະນັດອາດຕ້ອງເສຍຄ່າຜ່ານແດນກັບດ່ານກຳປູເຈຍເພີ່ມ ປາໂລມາ ທີ່ອາໄສຢູ່ບໍລິເວນນີ້ມີຈຳນວນ 20-25 ຕົວ ຊຶ່ງຖືວ່າເປັນຝູງໃຫຍ່ທີ່ສຸດໃນອາຊຽນ ພາບທີ່ເຫັນປາໂລມາດຳຜຸດຫລິ້ນນຳກັນ ບາງຕົວກະໂດດຂຶ້ນມາເໜືອນ້ຳ ແລະ ຖິ້ມຕົວລົງຢ່າງມີຄວາມສຸກ ກາງລຳນ້ຳຂອງ ຈະເປັນຄວາມຊົງຈຳທີ່ສ້າງຄວາມປະທັບໃຈໃຫ້ແກ່ທ່ານໄດ້ຢ່າງບໍ່ມີມື້ລືມ.
ປ່າສະຫງວນແຫ່ງຊາດເຊປ່ຽນ
ປ່າສະຫງວນແຫ່ງຊາດ ເຊປ່ຽນ ມີເນື້ອທີ່ກວ້າງໃຫຍ່ ແລະ ກວມເອົາດິນແດນສອງເຂດ ແຂວງຄື: ຈຳປາສັກ ແລະ ອັດຕະປື, ແຕ່ປ່າສະຫງວນດັ່ງກ່າວ ກວມເອົາພື້ນທີ່ແຂວງຈຳປາສັກເປັນສ່ວນໃຫຍ່ ພ້ອມກັນນັ້ນ ປ່າສະຫງວນແຫ່ງຊາດແຫ່ງນີ້ ໄດ້ຈັດໃຫ້ເປັນປ່າສະຫງວນແຫ່ງຊາດທີ່ລືຊ່າແລ້ວ ເມື່ອເວົ້າເຖິງນ້ຳໃສໃຈຈິງຂອງປະຊາຊົນທີ່ອາໄສຢູ່ເຂດປ່າສະຫງວນແຫ່ງຊາດ ເຊປ່ຽນແລ້ວ ລ້ວນແຕ່ມີມິດໄມຕີ ແລະ ວິຖີຊີວິດທີ່ລຽບງ່າຍສ້າງຄວາມ ຫລົງໄຫລໃຫ້ແກ່ບັນດານັກທ່ອງທ່ຽວທີ່ໄດ້ເດີນທາງໄປທ່ຽວໃນເຂດດັ່ງກ່າວຫລາຍສົມຄວນ.
ເມື່ອເວົ້າເຖິງປະຊາຊົນທີ່ດຳລົງຊີວິດລຽບຕາມເຂດດັ່ງກ່າວ ເຊິ່ງມີສອງຊົນເຜົ່ານ້ອຍໂດຍສະເພາະກໍ່ແມ່ນຊົນເຜົ່າຊຸ ແລະຊົນເຜົ່າໂບຣ ທັງສອງຊົນເຜົ່ານີ້ເປັນຊົນເຜົ່າສ່ວນນ້ອຍ ແລະ ເກົ່າແກ່ ໂດຍພວກເຂົາເຈົ້າພາກັນມາຕັ້ງບ້ານເຮືອນຢູ່ໃນເຂດປ່າສະຫງວນແຫ່ງຊາດເຊປຽນ ໄດ້ດົນເຖິງ 200 ກວ່າປີມາແລ້ວ, ກ່ອນທີ່ຈະມີປະຊາຊົນລາວລຸ່ມພາກັນມາຕັ້ງຖິ່ນຖານໃນເວລາຕໍ່ມາພຽງ ແຕ່ 50 ກວ່າປີເທົ່ານັ້ນ,ປະຈຸບັນນີ້ ມີປະຊາຊົນອາໄສຢູ່ເປັນຈຳນວນຫລາຍ ລວມເຖິງ 60 ກວ່າຫມູ່ບ້ານ, ມີຈຳນວນປະຊາກອນທັງຫມົດຫລາຍກວ່າ 10 ພັນຄົນ, ໃນນັ້ນມີ 48 ບ້ານທີ່ ອາໄສພາຍໃນປ່າ ແລະ ອີກ 17 ບ້ານທີ່ຕັ້ງຖິ່ນຖານຢູ່ເຂດນອກ, ເຊິ່ງພວກເຂົາເຫລົ່ານັ້ນລ້ວນແຕ່ມີຄວາມພ້ອມພຽງສາມັກຄີກັນໃນການຮ່ວມມື ເພື່ອປົກປັກຮັກສາປ່າສະຫງວນແຫ່ງຊາດເຊປຽນໃຫ້ຍືນຍົງ, ອາຊີບຂອງພວກເຂົາເຈົ້າສ່ວນໃຫຍ່ແມ່ນເຮັດນາ ແລະ ຫາປາ, ລວມເຖິງຫາເຄື່ອງປ່າຂອງດົງ ແລະ ຢາພື້ນເມືອງໃນເຂດປ່າສະຫງວນແຫ່ງຊາດໄປຂາຍຕາມທ້ອງຕະຫລາດສາມາດສ້າງລາຍຮັບໃຫ້ແກ່ຄອບຄົວ, ພ້ອມກັນນັ້ນ ປະຊາຊົນທີ່ດຳລົງຊີວິດໃນເຂດດັ່ງກ່າວບາງເຂດກໍ່ມີພື້ນຖານການດຳລົງຊີວິດທີ່ແຕກຕ່າງກັນ, ອີງຕາມຮີດ ຄອງປະເພນີ ແລະ ຄວາມເຊື່ອຖືທີ່ເຄີຍປະຕິບັດມາ, ແຕ່ພິເສດອັນພົ້ນເດັ່ນກວ່າ ຫມູ່ກໍ່ແມ່ນການຮັກສາຮີດຄອງປະເພນີ ແລະ ວັດທະນະທຳອັນດີງາມອັນເປັນເອກະລັກຂອງຊາດເຮັດໃຫ້ບັນດານັກທ່ອງ ທ່ຽວທີ່ເຂົ້າໄປທ່ຽວຊົມປ່າສະຫງວນແຫ່ງຊາດແຫ່ງນີ້ ມີຄວາມປະທັບໃຈ ແລະ ເຫັນໄດ້ເຖິງຄວາມແຕກຕ່າງກັນແຕ່ລະເຂດ ແຕ່ລະຫມູ່ບ້ານ ແຕ່ບໍ່ແມ່ນຄວາມແຕກຕ່າງດ້ານຖານະຫາກເປັນຄວາມແຕກຕ່າງຂອງວັດທະນະທຳຂັ້ນພື້ນຖານເຫັນແລ້ວພາໃຫ້ຫລົງໄຫລບວກກັບພາບທຳມະຊາດ ແລະ ບັນຍາກາດອັນງຽບສະຫງົບ.
ເອົາເປັນວ່າ ບັນດານັກທ່ອງທ່ຽວທີ່ມັກການຍ່າງປ່າ ຫລື ຕັ້ງແຄ້ມນອນຄ້າງຄືນຕາມແຄມປ່າ ຫລື ແມ່ນ້ຳໃນເຂດດັ່ງກ່າວກໍ່ດີ ທ່ານຈະໄດ້ພົບກັບຄວາມປະທັບໃຈແບບພິເສດທີ່ບໍ່ເຄີຍພົບເຫັນມາກ່ອນກໍ່ໄດ້ ເຊິ່ງສະທ້ອນອອກໃຫ້ເຫັນເຖິງການດຳລົງຊີວິດຂອງປະຊາຊົນຊາວເຊປຽນ ແຕ່ຖ້າຢາກໃຫ້ມີຄວາມເລິກເຊິ່ງ ແລະ ເຂົ້າໃຈແຈ້ງກໍ່ແມ່ນການທ່ອງທ່ຽວດ້ວຍການຍ່າງປ່າ ແລະ ນອນພັກຜ່ອນຄ້າງເຮືອນຢູ່ເຮືອນພັກອະນຸຮັກປະຊາຊົນມີສ່ວນຮ່ວມແມ່ນເຫັນວ່າ ເຫມາະສົມຫລາຍທີ່ສຸດ.
ປ່າສະຫງວນແຫ່ງຊາດພູຊຽງທອງ
ທຳມະຊາດໃນເຂດປ່າສະຫງວນແຫ່ງຊາດພູຊຽງທອງ ເມືອງຊະນະສົມບູນ ແຂວງຈຳປາສັກ ກໍ່ເປັນແຫ່ງຫນຶ່ງໃນຫລາຍໆບ່ອນຂອງເຂດພາກໃຕ້ຂອງລາວ, ແຕ່ສິ່ງສຳຄັນໃນສະຖານທີ່ດັ່ງກ່າວແມ່ນມີສັດປ່າອາໄສຢູ່ຫລາຍກວ່າບ່ອນອື່ນໆ ເຊິ່ງມີພື້ນທີ່ສ່ວນໃຫຍ່ກວມເອົາແຄມຝັ່ງແມ່ນ້ຳຂອງບ້ານໃຫມ່ສິງສຳພັນ ແຂວງຈຳປາສັກ ຈົນຮອດຫມູ່ບ້ານຈວບກັນແຫ່ງຫນຶ່ງລະ ຫວ່າງເມືອງຊະນະສົມບູນກັບເມືອງນະຄອນເພັງ ແຂວງສາລະວັນ.
ປ່າສະຫງວນແຫ່ງຊາດພູຊຽງທອງ ເປັນສວນປ່າໄມ້ຂະໜາດໃຫຍ່ກວມພື້ນທີ່ 995 ຕາລາງກິໂລແມັດ ເປັນແຫລ່ງຊັບພະຍາກອນທຳມະຊາດ ແລະ ຕົ້ນນ້ຳລຳທານທີ່ສຳຄັນ ເປັນທີ່ຢູ່ອາໄສຂອງສັດປ່າຫາຍາກ ນັກທ່ອງທ່ຽວສາມາດຍ່າງເສັ້ນທາງສຶກສາທຳມະຊາດໄດ້ ແຕ່ຄວນມີຄົນນຳທາງເພາະມີສັດປ່າຫລາຍຊະນິດ ແລະ ຍັງເປັນຈຸດຊມ ປາກົດການທຳມະຊາດທີ່ເປັນເອກະລັກຂອງບ່ອນນີ້ ຄືເມື່ອຍ່າງຂຶ້ນພູເຂົາໄປເຖິງຍອດໜ້າຜາ ຈະເຫັນພາບຂຽນສີຍຸກກ່ອນປະຫວັດສາດເປັນລາຍແດງເທິງໜ້າຜາພິ້ວໄຫວສວຍງາມເໝືອນທີ່ຜາແຕ້ມ ຢູ່ແຂວງອຸບົນຣາຊະທານີ ປະເທດໄທ.
ສະພາບພື້ນທີ່ຂອງປ່າດັ່ງກ່າວປົກຄຸມໄປດ້ວຍປ່າດົງດິບທີ່ອຸດົມສົມບູນໄປດ້ວຍຕົ້ນໄມ້ນ້ອຍ-ໃຫຍ່ທີ່ມີລາຄາແພງຍັງຮັກສາໄວ້ຢ່າງຫລວງຫລາຍ ກາຍເປັນທີ່ເພິ່ງພາອາໄສຂອງຝູງລີງ, ທະນີ, ກະຮອກ, ກະແຕ, ບັນດາສັດປີກອື່ນໆອີກ ເມື່ອທ່ານຫາກໄດ້ຍ່າງເຂົ້າໄປໃນປ່າດົງອັບຕຶບຫນາດັ່ງກ່າວນີ້ ຈະຮູ້ສຶກເຢັນສະບາຍພ້ອມເຕັມອີ່ມກັບອາກາດສົດໆຈາກທຳມະຊາດທີ່ຜະລິດຂຶ້ນຈາກປ່າສີຂຽວ ເຖິງແມ່ນວ່າຈະເປັນລະດູແລ້ງກໍ່ຍັງຮູ້ສຶກອົບອຸ່ນເປັນພິເສດ ສຽງຮ້ອງຄວນຄາງຂອງຝູງລີງ, ທະນີ, ນົກເຂົາກູດ ປະສານກັບສຽງ ແມງອີ ແລະ ຈັກກະຈັ່ນໃນຍາມເດືອນ 3 ເປັ່ງສຽງອອກເປັນບົນໆຕະຫລອດທາງເຫມືອນມັນຮ້ອງບອກຍິນດີຕ້ອນຮັບຜູ້ຄົນທີ່ເຂົ້າມາເບິ່ງບ້ານເຮືອນ ແລະ ຊີວິດການເປັນຢູ່ຂອງພວກມັນເມື່ອອອກຈາກປ່າຍ່າງຕາມ ທາງໂຄ້ງໄປຕາມຈ້າຍພູ ໄດ້ພົບກັບກ້ອນຫີນນ້ອຍໃຫຍ່ສະຫລັບກັນໄປຕາມເນີນພູມີລັກສະນະສູງຊັນເປັນຊັ້ນໆ ເປັນຫີນເກຣດດີ ເຫມາະສຳລັບການປຸງແຕ່ງ ເພື່ອເປັນສິນຄ້າເຂົ້າໂຮງ ງານອຸດສາຫະກຳ, ສາຍນ້ຳຫ້ວຍນ້ອຍມີນ້ຳໄຫລຕະຫລອດປີ ເປັນບ່ອນລົງກິນນ້ຳຂອງພວກສັດໃນປ່າ, ນອກນັ້ນ ຍັງມີໂຫງ່ນຫີນທີ່ຄ້າຍຄືຮູບສັດເກີດຂຶ້ນຕາມທຳມະຊາດຈາກການທັບຖົມກັນຂອງດິນ, ຫີນ ແລະ ຊາຍສະສົມ ແລະ ຖືກກັດເຊາະຈາກກະແສນ້ຳ ແລະ ລົມມາຫລາຍປີ ເປັນຕົ້ນກໍ່ແມ່ນຫີນຂ້ອງ, ຫີນເຕົ່າ, ຫີນສີລາລຶກເປັນຮູບສິງ, ດ່ານຜາເພີງ, ບາງບ່ອນເນີນບາງບ່ອນເປັນລານກວ້າງເຫມາະສົມກັບຕັ້ງແຄ້ມ ເພື່ອພັກຜ່ອນຢ່ອນໃຈ ເມື່ອໄດ້ໄປທ່ອງທ່ຽວ ຫລື ທັດສະນະກ່ຽວກັບລະບົບນິເວດວິທະຍາໃນເຂດດັ່ງກ່າວ.
ນອກນັ້ນ ຍັງມີເຂດບໍລິເວນຂອງປ່າທາມເຕັມໄປດ້ວຍກົກປ່າດຸກຫນາມ ແລະປ່າກະຖິນ ນ້ຳເປັນທີ່ຢູ່ອາໄສຂອງສັດນ້ຳ, ເຈົ້າຫນ້າທີ່ຮັກສາປ່າສະຫງວນເລົ່າສູ່ຟັງວ່າ: ໃນປ່າທາມຂອງ ປ່າສະຫງວນມີທັງຫມົດ 3 ບ່ອນ ແຕ່ລະບ່ອນແມ່ນມີສັດນ້ຳອາໄສເປັນສ່ວນຫລາຍ ແຕ່ທີ່ຫລາຍກວ່າຫມູ່ກໍ່ແມ່ນປາຄໍ່, ປາກະໂດ ແລະ ປາຂະແຍງໃນຍາມຝົນ ແຕ່ຍາມແລ້ງນ້ຳບົກລົງດິນຕົມແຕກເຫີບກາຍເປັນຮັງຂອງພວກຫນູ, ຍາມຫນາວ ອາກາດຈະເຢັນມີຫມອກປົກຄຸມໄປທົ່ວສະຫລັບຊັບຊ້ອນຄ້າຍຄືກັບຄື້ນຂອງຟອງໃນມະຫາສະຫມຸດ ແລະ ຖ້າເປັນຍາມແລ້ງກໍ່ສາມາດເຫັນທິວທັດຊ່ອງພະອາທິດລັບຂອບຟ້າໄດ້ຢ່າງຊັດເຈນ.
ไม่มีความคิดเห็น:
แสดงความคิดเห็น